படகு

பச்சோந்தியின் நிற மாறுதல்

2009-08-20T23:37:00.004+04:00

நம்மில் பல பேர் பச்சோந்தி போல அடிக்கடி குணம் மாறுவார்கள். நாம் பச்சோந்தி என சொல்லக் கேட்டிருக்கிறோமே தவிர உண்மையான பச்சோந்தியை பார்த்திருப்பது அரிது. அது தன் நிறம் மாறுவதைக் கண்டிருப்பவர்கள் அரிதிலும் அரிதாயிருக்கும். அவர்களுக்காக ஒரு பச்சோந்தியும் அது எவ்வாறெல்லாம் நிறம் மாறுகிறதென்பதையும் பற்றிய விளக்கப் படம்.

எப்படி இருக்கிறதென சொல்லுங்களேன்.

இவ்வளவு விரைவாக ஆண்கள் ஆடை மாறுவதே கடினம். அதிலும் பெண்கள் இவ்வளவு அதி விரைவாக ஆடை மாற முடிந்தால் பெரு வாரியான வெளி செல்லும் நிகழ்வுகள் சுமுகமாகவே இருக்கும். என்ன சொல்கிறீர்கள்.

ஒரு குப்பை வண்டி நிறைய படிப்பு

2009-02-06T21:26:00.007+04:00

விமான நிலையம் போக ஒரு வாடகைக் காரில் போனோம். இங்கு மூவழிச்சாலைகள். மெதுவாக செல்வதற்காக உள்ள வலது புறச்சாலையில் டாக்ஸி சென்று கொண்டிருந்தது. திடீரென ஒரு கருப்பு நிற கார் பார்க்கிங்கிலிருந்து தாவிக் குதித்து வெளிவரவும், எமது காரோட்டி படாரென பிரேக்கை அழுத்த, கார் வழுக்கி, அரை வட்டமடித்துத் திரும்பி அந்த கருத்த காரின் பின்னால் சில அங்குல இடைவெளியில் நின்றது.

கருத்த வண்டியை ஓட்டியவர் தம் காருக்கு வெளியே தலை நீட்டி எம்மை நோக்கி கேவலமாக சைகை செய்ததோடு ஏதேதோ திட்டினார்.
டாக்ஸி டிரைவரோ புன்னகைத்தவாரே அவரை நோக்கி கையசைத்தார். அதாவது வெகு சிநேகத்தோடு...

"என்ன இப்படி இருக்கின்றீர்கள். இன்னும் கொஞ்சமிருந்தால் அவன் உன் காரை நசுக்கி விட்டு நம்மையெல்லாம் மருத்துவமனைக்கு அனுப்பி இருப்பான்" என்று டிரைவரிடம் சொன்னேன்.

அந்த டிரைவர் எனக்குச் சொல்லித் தந்ததுதான் ஒரு குப்பை வண்டி படிப்பு

இங்கே பல மனிதர்கள் குப்பை வண்டி போலத்தான்.
அவர்கள் எண்ணங்களில், நிறைந்த குப்பைகளையும், மனம் முழுக்க ஏமாற்றத்தையும், வெறுப்பையும் கோபத்தையும் சுமந்து திரிகின்றனர். அவைகள் மிகக்கூடுதலாகிப் போனவுடன் அவற்றை அவர்கள் எங்காவது வீசப் பார்க்கின்றனர். சில நேரங்களில் உங்கள் மீது.

அவை தனிப்பட்ட உங்கள் மீது, வீசப்பட்டதாக உணராதீர்கள்.
சும்மா புன்னகைத்து, அவர்களை வாழ்த்தி, விலகுங்கள்
அவர்களின் குப்பைகளை நீங்கள் சுமந்து, பின்னர் அதை உங்கள் வீடுகளிலும், வேலை செயயும் இடங்களிலும், உங்கள் தெருக்களிலும் வீசாதீர்கள்.
சுருக்கமாகச் சொன்னால், வெற்றி பெரும் மனிதர்கள் இந்தக் குப்பை வண்டிகள் அவர்களின் நல்ல நாளைப் பாழாக்க விட மாட்டார்கள்.
ஒவ்வொரு விடியலையும் மனம் வருந்தி எதிர் கொள்ள நமக்கு வாழ்நாள் போதாது நண்பர்களே.

உங்களை நல்ல முறையில் நடத்துபவர்களுடன் அன்பாயிருங்கள். அஃதல்லாத மற்றவர்களுக்காக பிரார்த்தனை செய்யுங்கள்.

வலையுலகிலும் இதை கடைபிடித்தால், வலையுலகம் எவ்வளவு மகிழ்ச்சியான அனுபவமாய் இலங்கும்.

வாழ்க்கையில் நாமாக உருவாக்கிக் கொள்வது வெறும் பத்து சதம்(10%)தான். மிகுதி தொன்னூறு சதம் (90%) வாழ்க்கையை நீங்கள் எப்படி எடுத்துக் கொள்கின்றீர்கள் என்பதைப் பொறுத்தது.

இனி உங்களிடம் வரப்போகிற மகிழ்ச்சியான, குப்பைகளற்ற நாளுக்காக என் வாழ்த்துக்கள்.

நீங்களும் இப்படி யோசிப்பீங்களா?

2009-01-31T10:18:00.010+04:00

இப்படி யோசித்திருக்கிறீர்களா?
1. வெயிலில் அதிகம் காய்ந்தால் முடி வெளுக்கிறது ஆனால் ஏன் உடல் தோல் கருக்கிறது?
2. பெண்கள் கண்ணுக்கு மையிடும்போது ஏன் வாயைத் திறந்து வைத்துக் கொள்கிறார்கள்?
3. Abbreviation ஏன் இவ்வளவு பெரிய வார்த்தையாய் இருக்கிறது?
4. டாக்டர்கள் தாங்கள் செய்வதை ஏன் practice என்று சொல்கிறார்கள்?
5. உங்கள் பணம் முழுவதையும் முதலீடு செய்பவர்களுக்கு ஏன் broker என்று பெயர் வைத்திருக்கிறார்கள்?
6. கணிணியில் windowsஐ மூடுவதற்கு ஏன் Start பட்டனை அழுத்த வேண்டியிருக்கிறது?
7. ஏன் எலுமிச்சை ஜூஸை செயற்கை flavourல் செய்து விட்டு, பாத்திரங்கள் கழுவும் liquidல் உண்மை எலுமிச்சை பழத்தை பயன்படுத்துகிறார்கள்?
8. ஏன் வண்டிகள் மிக மெதுவாக பயணிக்கும் நேரத்தை rush hour என்று சொல்கிறார்கள்?
9. 'சுவை கூட்டப்பெற்ற புதிய வகை' என்று நாய் உணவில் எழுதியுள்ளார்களே, யார் சுவை பார்த்தார்கள்?
10. விமானத்தில் ஏன் அழிக்க முடியாத வகையில் கருப்புப் பெட்டியை மட்டும் செய்கிறார்கள்? முழு விமானத்தையும் செய்தாலென்ன?
11. Con என்ற வார்த்தை Pro என்ற வார்த்தைக்கு எதிரானதென்றால் Progressக்கு Congress எதிரானதா?
12. ஒட்டி கட்டப்பட்டுள்ள குடியிருப்புகளை ஏன் Apartments என்கிறார்கள்?
13. விமானத்தில் பறப்பது பாதுகாப்பானதென்றால் விமான நிலையத்தை ஏன் terminal என்கின்றார்கள்.?

இவ்வளவு பெரிதாய் எவ்வளவு அழகு!

2009-01-28T16:19:00.018+04:00

என்ன ஒரு அழகு! இது என்ன பாம்பின் கண்ணா?

குதிரையின் கடிவாளம் மாதிரி இருப்பது - தும்பியின் கண்!

ஒலி வாங்கி மாதிரி, பூச்சியின் கண்ணில் என்ன டிசைன்? இந்த டிசைனுக்கு யாராவது patent வாங்கியிருப்பார்களோ?

பனித்துளிக்குள் பூ பூக்குமா?

வீட்டு ஈ தான் காட்டெருமை மாதிரி இருக்கிறது

இது என்ன கண்ணா? லென்ஸே பிதுங்கி வழிகிறதா?

படங்கள் எப்படி இருக்கிறது நண்பர்களே. இறைவன் படைப்பில் இத்தனை அழகா?

இதயம் இளமையாக 7 டிப்ஸ்

2009-01-20T15:17:00.008+04:00

உங்கள் இதயத்தை எப்போதும் இளமையாக வைத்திருக்க டாக்டர்கள் தரும் 7 டிப்ஸ்
1. தினந்தோறும் உடற்பயிற்சி என்பதை வழக்கமாக்குங்கள். ரொம்பக் கடினமான பயிற்சிகள் எல்லாம் வேண்டாம். 30லிருந்து 45 நிமிடங்கள் வரை நடை பயிற்சி (வாக்கிங்) செய்யுங்கள். அது போதும்.
2. உங்கள் எடையைக் கட்டுப்பாட்டில் வைத்திருங்கள். அளவான எடை உள்ளவர்களுக்கு இதய நோய்கள் குறைவாகவே வருகிறது.
3. உணவுக் கட்டுப்பாடு அவசியம். கொழுப்புச் சத்துக் குறைந்த உணவுகளையே உண்ணுங்கள். உப்பைக் கொஞ்சம் தள்ளி வையுங்கள்.
4. கார்போஹைட்ரேட் கலோரியைக் கணக்கெடுங்கள். சர்க்கரை நோய் வராத அளவுக்குப் பார்த்துக் கொள்ளுங்கள். டயபடீஸ்காரர்களை இதய நோய்க்கு மிகவும் பிடிக்கும்.
5. ரத்த அழுத்தத்தை அவ்வப்போது பரிசோதனை செய்யுங்கள். 120/80 இருந்தால் சந்தோஷப்படுங்கள்.
6. இன்று முதல் சிகரெட்டை விட்டு விடுவதாக சத்தியம் செய்யுங்கள். அதிகமாக மது அருந்துபவர்களின் இதயம் சீக்கிரம் ரிப்பேராகி விடும் என்பதை உணர்ந்து கொள்ளுங்கள்.
7. மிகவும் முக்கியக் காரணம் உங்கள் முன்னோர்களுக்கு இதய நோய் இருந்தால் உங்களுக்கும் அது தொற்றிக் கொள்ளும் வாய்ப்பு அதிகம். உங்கள் அப்பா, அம்மா, சகோதரர் யாருக்காவது இதய நோய் இருந்தாலும் நீங்களும் ஒழுங்காக அவ்வப்போது பரிசோதனை செய்து கொள்ளுங்கள். உங்கள் குழந்தைகளுக்கு நீங்கள் இதய நோய்கள் இல்லாத அப்பா அம்மாவாக மாறுங்கள்.

மிகச்சுலபமான வழிமுறைகள்தான். சரியாக பின்பற்றினால் பெரிய ஆபத்தை தவிர்க்கலாம். அனைவரும் முயற்சி செய்வோம்.

இப்பத்தான்டா சொன்னேன் வெண்ணெ

2008-12-29T21:56:00.000+04:00

அண்மையில் என்னிடம் வந்த ரூபாய்த் தாளின் முன் பக்கமுள்ள வெள்ளைப் பகுதியில் ''திருப்பிப் பார்க்காதே'' என்ற வாசகத்தை யாரோ எழுதியிருப்பதைக் கண்டேன். அப்படி என்னதான் பின் பக்கம் இருக்கிறது என்ற ஆவலில் திருப்பிப் பார்த்தேன் ''இப்பத்தான்டா சொன்னேன் வெண்ணெ''' என்று எழுதப்பட்டிருந்தது கண்டு நொந்து போனேன்

உருளைக் கிழங்கில் ஒரு பாடம்.

2008-12-29T21:48:00.000+04:00

ஒரு ஆசிரியை தன் மாணவர்களைப் பார்த்து ஒரு விளையாட்டுக்கு அழைத்தார். “மாணவர்களே! தேவையான அளவு சிறு சிறு உருளைக் கிழங்குகளை எடுத்துக் கொள்ளுங்கள். ஒவ்வொரு உருளைக் கிழங்கின் மேலும் நீங்கள் வெறுக்கும் ஒருவரின் பெயரை எழுதி வையுங்கள். அதை ஒரு பையில் போட்டு உங்களுடனே வைத்துக் கொள்ள வேண்டும். நான் சொல்லும் வரை தூரப் போடக்கூடாது'' என்றார்.

சிறுவர்களுக்கும் இவ்விளையாட்டு ஜாலியாக இருந்தது. அவரவர் வெறுக்கும் மனிதர்களின் எண்ணிக்கைக்கு ஏற்ப உருளைக்கிழங்குகளை எடுத்துக் கொண்டார்கள். பெயர்களை எழுதி தங்கள் பைக்குள் போட்டுக் கொண்டார்கள்.
ஒரு நாள் இரு நாள் என சில நாள் போனது. ஆசிரியை. உருளைக் கிழங்குகளை வெளியில் எடுக்கச் சொல்லவே இல்லை. நான்கைந்து நாட்கள் கழிந்ததும் கிழங்கு அழுகி நாற்றமடிக்கத் துவங்கியது. மாணவர்களால் அவற்றை பையில் வைத்துக்கொள்ள இயலவில்லை. ஆசிரியையிடம் சொன்னார்கள்.

“மாணவர்களே! விளையாட்டு மாதிரி ஆரம்பி த்தாலும் இது எல்லோருக்கும் பாடம். பையில் இருக்கிற உருளைக்கிழங்கு மாதிரிதான் மனதிலிருக்கும் வெறுப்பும். அது மனதையே கெடுத்து விடும். உருளைக் கிழங்கை நான்கைந்து நாட்கள் வைத்திருக்கவே கஷ்டப்படுகிறீர்களே. மனசுக்குள்ள எப்போதும் ஒருவர் மேல் வெறுப்பு இருந்தால் என்ன ஆகும்? யோசித்துப் பாருங்கள். உருளைக் கிழங்கோடு மற்றவர்களின் மேலிருந்த வெறுப்பையும் தூக்கி எறியுங்கள்'' என்றார் ஆசிரியை.

எல்லாமிருந்தும்

2008-11-26T22:14:00.000+04:00

ஒரே மகள் ரொம்பச் செல்லம்
கண்மணி என்பார் தந்தை
அருமை மகளென்னை செல்லமே
என்றழைத்த வாய் மாறாத தாய்
கோபமிருந்தாலும் அன்பே என்றே
அன்பாய் அழைப்பார் கணவர்
பாப்பா என்ற பாசத்தில் குறை வைப்பதில்லை தமையன்
மாமி என்பாள் மரியாதையாய் குட்டச்சி, என் அண்ணன் மகள்
மச்சி மகளுக்கு நான் சாச்சி
ஆயிரம் பேர் அழைத்த போதும்
எல்லாமிருந்தும் எதுவும் அற்ற வெறுமையாய்
அம்மா என்றழைக்கும் மகவுக்கு
வரம் கேட்டு தவமிருக்கும் நான்